以快辰候我听遘不学无术兹其词，无乇乇见觉。
不过现时就稠稠见著侬“不学无术”。
贴吧内里有侬讲其话，我见著其蜀部份事计，我见觉有必要讲蜀讲。
头头下就是不学无术。有其同学完全无去学，就是靠猜过日子。伓是就是抱定错误其看法，故著讲呀尽大声，兹就真正叫不学无术。
比只例来讲，有侬见觉文读是普化以后得来其福州音，统统都无干，都著废去。我讲汝各 乇都伓去学，就开始讲著“复古”，真真是好笑。兹俪是蜀种，兹种错误是教育无够，因为我各侬根本都无母语教育。所以我就想，一定著有母语其教育。
著有母语其教育，就一定著有侬来教，著有侬来教，就著有侬学呀比别侬济，故俪有办法教，故此讲，一定著有侬去学许中“高深”其学问，然后教乞别侬，兹款正俪有办法改变以后母语其情况。
汝看贴吧内底各侬其讨论，看书就解解决大部份，伊就是伓看书，明明有最简单其墿，伊就是伓行，偏偏自家去开蜀条墿，故坚持行许蜀条勿会好行，甚至是错误其墿，我勿会八兹款其侬是怎底想其。比如蜀只字，八音上底可能写呀好好其了，伊伓去看，自家去猜半工，也无一定对。兹款其字是伓是就俪蜀只？伓是，尽济，所以汝著去学。
第二下，我做乇事著开屏南话其微博？我见觉兹比蜀只平话堂其微博好偌夥都勿会八。几其侬管理蜀只微博，头下失去其优势就是互动。我开屏南话、告侬开闽县话、闽清话其微博，我各侬就有办法交流，可以互相@，可以探讨各其县勿会蜀样其地方。兹种勿会蜀样是客观其，现实其，应该承认兹种勿会蜀样，伓是混作码。平话堂可以转发，兹款故俪是最好其方式。开微博其意义，就是通过勿会蜀样其微博其互动交流，最后使大家认识勿会蜀样其地方，也更清楚其实勿会蜀样其地方故是少。欧盟、非盟，讲前来都伓惊人笑。汝看欧洲几其国家和作码了？是共蜀其国家了？兹情况其实上是共平话蜀模蜀样其，一定程度上可以合作，但是完全和做堆其条件故未成熟。
微博俪是驮来记录我平常听遘学遘其乇，以后可以慢慢整理，同时也可以宣传母语，何乐而不为？
第三下，我转遘屏南，就发现平话故是活其，无汝各侬讲其许严重。如果屈贴吧故俪是争平常其问题，我讲就无必要争了，随便寻蜀只会讲平话其，都是可以争其。我各侬有必要去学难其乇，做好准备爬语文其树，兹款正俪有办法改变“有语无文”其情况，正俪有办法通过书面其方式，以词典为基础，慢慢发展文学，最终发展母语文。所以我就俪几其方向。
① 词典。
兹是基础，也是语文标准化最重要其蜀步。
② 词汇
兹包括词、俗语、谚语、童谣、民歌等等可以记录其作品，兹是我各侬发展母语文学其基础。
③ 母语文学
如果头囝两下完成，就有可能发展母语文学。
基本上就是蜀爿学、蜀爿记、蜀爿标准化、蜀爿使。除去兹几件事，就无乇要紧其了。